Horoia, Tunua, Whakamātaotia

Ka tīmata ngā tikanga akuaku kai pai ki ngā ringaringa mā, engari he mea nui tonu kia mā tō wāhi tunu me ō taputapu. Ko tētahi atu mea nui hei maharatanga me karo i te hōrapatanga o te huakita i te kīhini. He māmā noa tana hōrapa mai i te mīti ota ki ētahi atu kai me ētahi atu mata.

• Horoia ngā mata, ngā papa tapahi, ngā taputapu kīhini (pēnei i ngā oka) ki te hopi me te wai wera, ā, ka horoi ki te wai māori:
  • i mua o te whakamahinga ki te whāwhā me te whakataka kai
  • i waenga i te whakatakanga o te kai ota me te kai tunu
• i muri o te horoi, mukua ngā mata kīhini ki te mehanga whakatoki waimeha (1 tīpune whakatoki ki te 2 rita wai).
• Horoi i a koe e mahi ana, ā, me wawe tonu te whakapai i ngā maringitanga.
• Kaua e horoi i te heihei ota. Mā te horoi i te heihei ota i mua o te tunutanga, e piki ai pea te mōrearea o te paihana ā-kai mai i te huakita  campylobacter . Ka taea e te wai paratī mai i te  horoi i te heihei  i raro i te kōrere wai te hōrapa te huakita ki ngā ringa, ngā mata mahi, ngā kākahu me ngā taputapu tunu.
• Āta horoia, whakamaroketia hoki ngā ipu kai i mua o te whakamahinga.
• Whakamahia ngā hautai rerekē, papanga rerekē rānei mō ngā rīhi, te tūpapa, me te papa. Me noho wehe tētahi i tetahi atu.
• Whakamahia ngā tāora pepa ki te whakapai i ngā maringitanga weriweri pēnei i te wē mīti ota, kātahi ka muku ki te papanga te waiwera me te hopiwē.
• Me auau te whakakapi i ngā maramara, ngā hautai rānei ka taea te whakamahi anō. Horoia ki te wai, kātahi ka:
  • horoi ki te wai hopi wera, ka waiho kia waiwai mō te pō i tētahi rīhi wai pāpaku, me te 5 ki te 10 pata whakatoki, kātahi ka whakamaroke, māna rānei me
  • horoi i roto i te pūrere horoi kākahu mā te huringa wai wera, kātahi ka whakamaroke.
• Whakamahia tētahi pūrere horoi rīhi, te wai hopi wera rānei ki te horoi i ngā rīhi. Waiho ngā rīhi kia maroke i te hau, ka mahue te whakamaroke ki te tī tāora.
• Me uhi i ngā kai - ahakoa i te pākatio, te kāpata rānei. Kia mahara ki te uhi i ngā kai ina haria ki waho (pēnei i te rorerore kai) ki te aukati i ngā ngārara me ngā huakita. Whakamahia ngā ipu me ngā uhi kitakita.
• Whakawehea te mīti ota me te heihei mai i ngā kai me kai tonu, ngā huarākau me ngā huawhenua. Waiho ki te wāhanga o raro o te pākatio kia kore ai ngā hinu - kei roto pea ngā huakita kino - e māturuturu ki runga i ētahi atu kai.

Me whakarite tonu kia tōtika te tunu i ngā mīti katoa me ngā kaimoana hei patu i ngā huakita kino.  Me puata katoa ngā wairanu o te heihei me ngā tōtiti, ā, kia kaua e māwhero te mīti o roto. Whakamahia tētahi ine-mahana mīti ki te tiro i te pāmahana i te wāhanga mātatoru rawa (te wāhi e tika ana kia eke te pāmahanatanga ki te 75°C neke atu rānei)

• Kia tika te whakarewa i ngā kai whakakōpaka kia pai ai te tunu i waenganui. Me whai rānei i ngā tohutohu tunu kei runga i ngā tapanga, ngā tākai rānei e kī ana ka taea e koe te tunu ahakoa kua whakakōpaka.
• Whakamahia tētahi kohinga taputapu mō ngā mīti ota me te heihei, me tētahi atu mō ngā kai maoa. Utaina ngā kai maoa ki tētahi pereti mā, kaua ki tētahi i whakamahia mō ngā kai whakauru ota.
• Tirohia ngā tohu "rā whakamahi" kei ngā tākai kai. Kaua e hokona, e kainga rānei mēnā kua hipa taua rā.
• Mēnā he tohu kei runga i ngā kai e kī ana "he pai ake i mua", he pai ki te kai i aua kai i muri o te hipanga o te rā mēnā kāore koe e kite ana i ngā tohu kua "pirau" ngā kai. Mā tō ihu me ō karu e rapu i ngā tohu mēnā kua pirau, kua hōpurupuru rānei. Mēnā kei te māharahara, makaia.

Kāore e tupu te nuinga o ngā huakita kino i ngā pāmahana makariri o te pākamātao. Tautuhia te pāmahana o tō pākamātao ki waenga o te 2°C and 5°C, ā, ka whai i ēnei huatau.

• Me wehe ngā kai ota me ngā kai maoa i roto i te pākamātao
• Puritia ngā kai maoa i runga i tētahi whatanga teitei ake i ngā mīti ota, heihei rānei Mā tēnei e ārai i te māturuturu o ngā wairanu mīti ota me te heihei ki runga i ngā kai me kai tonu)
• Waiho ngā kai wera kia mātao haere mō te 30 mineti i te pāmahana ā-rūma i mua o te whakamātaotanga i rō pākamātao, kia kore ai te pāmahana o te pākamātao e piki.
• Whakamātaotia ngā inati kai wera nunui mā te whakawehewehe ki ngā ipu pakupaku (mā tēnei e āwhina kia tere mātao ai ngā kai), ka ūhia, ā, ka raua ki te pākamātao.
• Kaua e waiho i ngā kai i te pāmahana ā-rūma mō te rua hāora neke atu rānei.
• Kia mā tonu tō pākamātao, kaua e kaha rawa te whakakīhia. Ki te pērā, ka aukatia pea te rere haere o te hau mātao, ana ka pāngia te pāmahana o ngā kai i roto i te pākamātao.
• Puritia tētahi pēke mātao, ipu rānei ki tō motukā hei kawe i ngā kai mātao, whakakōpaka rānei, ā, ka whakawhiti tōtika i ēnei ki te pākamātao, pākatio rānei i tō taenga ki te kāinga. Whakamahia ngā pēketio mēnā he haerenga roa tāu i muri mai o te hoko kai, e kore rānei koe e hoki tōtika ki te kāinga.